睇病有感（經典粵語寫作範例）
琴日身體唔多掂當，搭咗86路，運（注：運，介詞，從、打）大學城去大德路嘅省中醫。小洲過啲嘅地方，沿路都係爛湴泥（湴，ban6，爛泥之意），扽到我屎窟都痛曬。
經過江南大道嗰陣，望到珀麗酒店呢個因為係全國第一間由農民合資建造而畀老廣們稱為“bog1佬酒店”嘅酒店建築，而家經營得火紅火綠，之佢對住嘅爛尾樓，就經已爛咗好耐世秋喇。一對比，不禁令人唏噓！
一落車，我連隨就行去省中醫。喺掛號處，我聽到兩把聲音——路人甲：咦？你又嚟睇醫生吖？ 路人乙：係吖！咁啱嘅？你又係睇病啊？
由於我病緊，心情好曳（yei5 壞、差），我冇厘神氣噉心諗：都攞肺嚟噏嘢嘅！嚟親醫院嘅都係“茶瓜送飯——好人有限”，唔係病君就係病壞（注：“壞”變讀wai2），唔係周身hing3就係攰賴賴（gui6 lai4 lai4）。好人好姐、冇損冇爛，嚟醫院貪呢度馨香吖？緊係嚟睇醫生啦，唔通睇大戲咩？！
…………………………
今日嚟睇病，發覺省中醫嘅電腦化程度幾高下，唔使病人咁揼工（揼，dem1。揼工，費工夫、費時間），慳時又慳力，認真抵贊！
之醫院始終係醫院，食水太深，睇次醫生實在好揦脷吖！
希望自己可以啦啦林（la4 la4 lem4）好番啦~~
评论