從化森林公園兩天遊(多圖,我認識了兩個靚女,一個靚仔)
冇錯喇,呢度就係16年前嘅從化森林公園,左邊第一個就係16年前跳皮嘅我~~(當然,而家仲係咁百厭,咁紮紮跳嘅~)
以下係當年嘅相以及相片描述,括號外為當年我說的話或設計對白,括號內為而家嘅聯想、感想。
2.呢兩個係我嘅砂煲兄弟!(這兩個是我拜把的兄弟! Ps.其實啱識唔係幾耐~~ 咦,睇嚟我細個識女仔有番兩度喎~~ 哎……但係點解越大越冇鬼用嘅呢?唔得,我要向3歲大嘅我學習!!!)
3.你睇,我哋啱識冇耐就成為咗“落雨擔遮——死擋(黨)”喇! (可惜再慣熟再行得埋都好,而家經已浸死鴨乸咁耐嘞,大家早就三九唔識七喇!哎……希望今後識嘅靚女唔會噉啦!)
4.喂?火車即將到站,快啲嚟接我哋! (細細個嗰陣至鐘意攞住部大哥大扮大哥,一邊詐聽電話一邊跑通街,真係得戚嘞! Ps.注意後面嗰個靚仔,著數曬佢添~~)
5.睇,攝影師顯然冇對好焦! 唔畀我跑跑趯趯,要我企定定影相?哼,唔制! (哈哈,人哋個個正正經經,至多事實嘅就係我嘞!硬係古靈精怪嘅~~~)
6.快啲喂我吖,我餓到肚皮黐背脊喇! (斂下斂下個嘴仔,唔知係肚仔餓呢,定係斂脷係我當年嘅招牌動作呢? 注:斂,音lém ,舔、舐)
7.受死啦! (我好似要掹槍噉,無形槍!)
8.自細我就一副志存高遠嘅樣~~ (我而家懷疑當時係望到天鵝想食天鵝肉~~~~)
9.小姐姐認第二,小妹妹認第五,我呀敢認第一 (呢個係細個仔嗰陣嘅相冊入便,爸爸幫我設計嘅對白,佢次次都同我設計埋啲好抵死嘅對白,又貼切,又入肉,逼真到連我都懷疑我當時係咪真係噉樣做,噉樣講過)
10. 從化森林公園大合照~~ 嘻嘻,至百厭嘅就係我喇~~遮埋後便嘅叔叔添~~
亮亮
2009年07月19日 17:35:33
评论