四川之旅通告,有興趣者歡迎
各位兄弟姊妹:
我原先同你講嘅暑假去中原地區旅遊,初探中原文化嘅計劃有所改變喇~~
事因四川政府向廣東學子推出了一張“熊貓卡”,憑此卡去四川很多著名景區遊玩均免去門票!!!推行此卡一則是為答謝廣東學子對四川災區的援助,二則也是因旅遊市道不景氣而拉動旅遊消費的措施吧。
此卡只需5元即可在網上訂購,訂購時須和學生本人資訊相掛鉤(即買後只能本人使用)。“熊貓卡”此項業務聽說是12月截止。
正是由於有如此大的優惠以及有時間限制,所以我決定了,就這個暑假自助遊四川喇!!!具體時間待定,大概七月底~八月初,不會早於7月26日(遷就某演唱會)。
由於家父走遍大江南北,行勻全國各地,所以我向他請教了不少旅遊經驗,詢問了一些四川之旅的資訊。以下是我的初步計劃與粗略預算。
由於有此卡能夠免除大部分景點門票,所以旅行費用將很低很低,主要只需計算食宿交通費用。大概去10天,2000元左右;如果也去重慶的話(個人認為去四川要連帶去埋重慶),就大概15天,3000元左右。
去的地方大概選擇了重慶武隆、四川成都(武侯祠、杜甫草堂等)、峨眉山、樂山大佛、九寨溝、黃龍等。
四川的消費水準不高,住有空調嘅招待所、旅店一晚都只係50元,一般80元已經可以住比較高級嘅喇。川菜係中國八大菜系之一,但係喺四川食嘢都唔會好貴。總言之,各位如果唔係手指罅疏大花大使嘅話,相信唔使3000添~~
性價比高(價格低廉、遊覽地點多)會係我今次旅遊嘅主要特點。除此之外,最僑嘅就係自由度大!!!以往跟團旅遊,次次都冇鞋拉隻屐噉,去完呢度就雞噉腳去下一度。其實我唔多鐘意“趕鴨子”、走馬看花式嘅旅遊方式!
去親旅遊,好有意義嘅博物館先畀啲多時間,睇個吉吖!購物點就揼到耐一耐,搵老襯咩!今次我自己組織策劃就唔使喺啲無啦謂嘅地方嘥心機捱眼瞓啦~~~
除咗自由度大之外,對於我哋大學生嚟講,今次旅遊好重要嘅一方面,就係可以鍛煉到自己嘅思維同能力!自己妥善理財,自己獨立遠行,自己照顧自己,總言之完全一腳踢,自己組織、策劃、安排好曬行程路線及衣食住行等一切情況!直情有種放開手腳、獨闖天下嘅feel啊!!!所以今次係時候鍛煉下自己喇~~~~
進一步嘅計劃過多兩日發上嚟,如果你都有興趣,唔該同我講聲先啦,無任歡迎~~~哈哈~~~
亮
2009年07月08日 20:48:33
评论