注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

Leon Chan的博客

http://weibo.com/chenliangleonchan

 
 
 

日志

 
 
 
 

今夜我醉了  

2011-09-07 21:46:20|  分类: 工作生活 |  标签: |举报 |字号 订阅

  下载LOFTER 我的照片书  |

今夜我醉了

 

琴晚喺市長大廈嘅半島名軒酒家飲大咗,醉到成坺泥噉。

人哋去飲,要畀人情;我去飲,仲有利事收,緊係精神爽利飲得high啦!哈哈,講笑咋,尋日係有幸為饒偉東先生、譚穗儀小姐主持婚禮!戥佢哋開心,婚宴收尾飲多咗兩杯,於是乎成個人就fed1 fed1地嘞……

婚禮開首之前,化妝師嵐姐同我“搽脂蕩粉”,遮一遮青春嘅印記。真係好手勢啊,三扒兩撥就執正喇!佢仲話下次幫我化翻個韓劇男主角嘅妝喎,哈哈哈哈!著埋套老西,成個人“變咗身”。之後姣屍扽篤噉自拍咗幾張,我嘅光頭第一次出鏡~~某人一直想要我嘅光頭照,哈哈,家下收貨啦?

“五時恭候,六時入席,(七時埋位,)唔到八時冇得食”,今日依然係例牌。好唔容易啲人客都埋席嘞,婚禮正式“開波”。除咗有兩個肥仔做“倒米壽星”,喺度wi1嘩鬼震,冇好幫襯之外,成場婚禮總算順風順水,冇乜leg1 keg1

兩個肥仔周不時鼠過嚟想偷蛋糕食,婚宴埋尾又搶咗支嘜扮鬼扮馬,實行做嘜霸噉話。咪睇佢哋夾埋都未夠稱,卻係人細鬼大,鴨細扶翅大——當新郎哥大嗌“老婆過嚟”嗰陣,佢哋跟口“準備攻擊”……你哋明嘅~~

有個戥穿石特別玩得,四周圍聊女仔,好快就同啲姊妹拉拉扯扯、勾勾搭搭、咿咿挹挹,仲學人合巹交杯添!玩玩下仲掹埋我過去同伴娘Mandy對杯!我就噉畀人?冧咗了……

一邊喺張凳度死屍爛撻,一邊仲發下牙痕。瑩姐話有種甜酒叫“Long Island Ice Tea”(長島冰茶),甜甜地唔覺掯(keng3,酒濃烈),但實情好易上頭,事關佢摳咗好多款酒。於是我同嗰個“傻傻戇戇”嘅兄弟蘇文峰就不停噉念口簧,噏住呢隻酒嘅名喇~~哈哈~~

仲同半島名軒個女部長傾咗幾句,我話以後我嚟食飯係咪畀個八折我,佢話冇問題,話鋒一轉又講話——“請你吃不就折都不用打咯”!哈哈哈,好,夠爽快!我鐘意!最緊要以後合作愉快吖嘛,哈哈!

臨尾同新郎哥又“摸咗下酒杯底”,倾咗兩三句“密偈”。其實今次好多得佢咁睇得起,畀我擔綱做司儀,好在做得好好睇睇冇失禮。做婚禮主持好幾次嘞,今次係第一次同主人家傾得咁埋,兼夾做埋FRIEND

十點半喇,係時候返扯嘞。我掬紅塊面,腳步浮浮,昏(音“瘟”)昏沌沌,行曬企鵝步噉。嵐姐飲咗咁多,面不紅心不跳,仲猛咁話“未夠喉”!以後擋酒一於搵嵐姐喇~~

一路搭的士,我一路諗翻我呢世仔頭一次醉酒嘅經歷——我15歲嗰年去山東、遼寧玩,喺青島啤酒博物館免費任飲生啤。我哋平日飲嘅啤酒為咗保存起見,出廠前會將所有酵母菌殺死;而啤酒廠呢度新鮮出嘅生啤,因為存有酵母菌而爽口清甜,直呈“打邊爐同打屎窟——爭天共地”!我就係噉飲到喺車上“攤屍”了……

今晚飲醉,係因為我心爽!能夠做到嘢,能夠識到人,能夠參與策劃、主持呢對新人一生人一次嘅婚慶大事,自然應該嗒多兩杯賀賀啦,係咪?

 

 

注:

倒米寿星●dou2 mai5 sau6 sing1 专门损害自己方面利益的人。

déb1小口地吸。

 

2011年09月07日 - 憂淒居士 - 憂淒居士的博客超勁嘅化妝師嵐姐~~
 
今夜我醉了 - 憂淒居士 - 憂淒居士的博客
 
今夜我醉了 - 憂淒居士 - 憂淒居士的博客
 
今夜我醉了 - 憂淒居士 - 憂淒居士的博客
 
今夜我醉了 - 憂淒居士 - 憂淒居士的博客
 
今夜我醉了 - 憂淒居士 - 憂淒居士的博客
 
今夜我醉了 - 憂淒居士 - 憂淒居士的博客
 

 

2011年09月07日 - 憂淒居士 - 憂淒居士的博客第一次光頭出鏡,醉酒示人,失禮失禮…………(完)

 

 

 

  评论这张
 
阅读(161)| 评论(7)
推荐 转载

历史上的今天

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2018